Нэгэн цагт бүгдийг шуугиулж, охидод крашлуулж явсан "Хоёр хүү" хамтлаг урлагийн ертөнцийг орхиод хэсэг хугацааг үдэв. Гэсэн ч тэдний уран бүтээл өнөөдрийг хүртэл хуучраагүй. Гавана, Иксэр хоёр яагаад сураг алдарсан нь, өнгөрсөн хугацаанд юу хийж байсан нь сонсогчдод сонирхолтой байсан ч тэгсгээд орхисон биз.
Тэгвэл шинэ мэдээ дуулгахад Гавана буюу Б.Наранмандах дахин уран бүтээлийн ажилдаа ханцуй шамлан оржээ. Тэрээр эргэн ирэлтээ зарлахдаа өөрийн өнгөрсөн амьдралын үнэнийг өчин, бараан өдрүүдийн түүхээ сургамж болгон хуваалцлаа.
"Би өмнө нь хэнд ч хэлж байгаагүй түүхээ хэлье ээ… Шинэ уран бүтээлдээ ингэж их сэтгэл гаргаж удааж байгаа шалтгаан нь би энэ клипээ өөрийн туулж өнгөрүүлсэн амьдрал болон архи гэдэг зүйл хүнийг ямар гоё байхаас ямар муухай болгодогийг харуулах гэж зорисон юм аа…
2000-н оны эхний 5 жил охин болгон надад дурладаг, очсон газар бүр бидэнд нээлттэй, хийсэн тоглолт бүр дүүрэн, зорьсон ажил бүр бүтдэг байж. Заа ингээд 1+1=2 ХҮҮ, ЗА цомогийн тоглолтууд амжилттай болж өнгөрч, үүний дараа тун удалгүй XR эхнэртэй болоод Өмнөговь руу 1 сар яваад ирнээ гээд тэр чигтээ алга болов, ингээд үндсэндээ хамтлаг ч тарав. Тэгээд би ч гэр бүлтэй ч болж, үнэхээр урлагт хайртай тул ганц дайчин ганцаардахгүй гээд Хар Сарнай хамтлагийн Маадай ахын студи дээр 2008 оны орчим өдөр шөнөгүй дуугаа бичиж, гэтэл нэг л өдөр тог нь тасраад, хард нь шатаад бүх хийж байсан файл устаад… тэр дуунууд ч талаар болов.
Ингээд 2009-2010 оны орчим талийгаач МСИТ бид хэд Хэрээ Хөгжим гэдэг студи нээн би бас л бууж өгөлгүй "Galaxy” цомгоо бичүүлж, өлгийдөн авч, нээлт хийсэн өдрөө зарагдаж дууссан байдаг. Сайны хажуугаар саар гэгчээр энэ үед хувийн амьдрал минь их таагүй байсаан, эхнэр маань Эх Нялхас эмнэлэгт 2 ихэр хүүхдийг маань төрүүлнэ гээд эмнэлэгээс оргож алга болсон, би гэдэг хүн чинь айх гайхах зэрэгцээд баахан л цагдаа шүүх болсон, одоо ч 2 хүүхдэд минь чухам юу болсоныг мэддэггүй. Вагон дотор хүүхдүүдийнхээ эхоны зургийг хараад үхтлээ уйлаад ээжийн дүүгийн мал дээр хөдөө гараад энэ бүгдийг мартах гэсэн дээ… Ингээд хэсэг хугацааны дараа тэр хүнийг уучлаад, эвлэрээд, дахиад гэр бүл зохиох гэж оролдсон, гэтэл охиныг минь төрүүлчихээд нэг нас хүрээгүй байхад нь орхиод явсан юм даа… Хүнд итгэдэг хүний сайхныг харах гэж үздэг тэнэг зандаа өөрийгөө хараан зүхэж байлаа. Ингээд л тун удалгүй хажуугийн орцноос өөр залуутай гарч ирж байхыг 2 нүдээрээ харсан юм даа. Энэ явдлаас хойш юуун шинэ уран бүтээл хийх, дуулах, хуурдах, архи л миний найз болсон доо.
Тун удалгүй Франц явж цэргийн алба хаах гэж үзсэн, үнэхээр хүний нутаг хүйтэн байдаг гэдгийг тэнд л мэдэрсэн дээ. Эхнэр маань охиныг маань байнга яриулаад байхаар би 1-р ангид орох гэж байхад нь ирээд, энэ бүх зүйлийн дараа ч хүүхдээ бодоод эвлэрэх гэж үзээд ирсэн ч ёстой боов өмхүүлнэ гэдэг шиг л юм болоод талаар өнгөрсөн дөө… Бие өвдөөд байхаар нь эмнэлэгт үзүүлээд жоохон байхдаа шивээс гэж гүйж байж шивээсээр С-вирус аваад, дээрээс нь сэтгэлээ дэвтээх гэж уусаар байгаад элэг өвдсөн байсан. Ингээд сэтгэлээр унаад явж байтал караокед дуулж байхад бүлэглэж ирж намайг зодоод хамар мурийсан. Насаараа олны хайрыг хүлээж, гоё сайхнаараа магтуулдаг байсан хүн чинь нүүр царай тийм болчихоор үнэхээр сэтгэлээр унадаг юм байна лээ. Ингээд би гэрээс ч гарахаа болисон, дахиж хэзээч дуулахгүй гэж шийдсэн.
Заа ингээд л үнэхээр бууж өгье гэж шийдсэн байхад хаанаас ч юм бэ тэнгэрийн элч гэмээр надаас маш олон дүү нэг жоохон охин миний амьдралд орж ирээд ёстой болгож тавьсан даа. Анхандаа бас л архи уун түүнийг зовоон ажил дээр нь ч согтуу очоод л… Тун удалгүй ах минь 2022 оны 12 сард бурхан болов. Ах минь байхгүй байсан бол өнөөдөр Гавана гэж хүн байхгүй байх байсаан. Анх гарч ирж байхад ахаасаа бүх юман дээр мөнгө аван 2 Хүү хамтлагийг босгож билээ. Үргэлж л хажууд минь байсан. Миний ах… Үнэхээр шоконд ороод, энэ үед ч гэсэн, энэ охин бууж өгөлгүй намайг дэмжсээр л байв. Би нэг л өдөр өөртэйгөө ярилцаад энэ бүх зүйлд цэг тавихаар шийдсээн. Хайрын хүч гэж үнэхээр байдаг юм билээ. Дээрээс нь хамгийн чухал нь хүний сэтгэлийн хүч гэж бүхнээс илүү.
Одоо би архинаас гараад хагас жил болоод, миний бүх шинжилгээнүүд хэвийн болж эхлээд, буцаад уран бүтээлээ хийж эхлэж байна. Тэгээд бас хамрыг минь тайван байлгадаггүй хүмүүсд хэлэхэд хэхэ удахгүй ээ заа! Цусны шижилгээнүүд хэвийн болж өгөхгүй удчихлаа одоо л жигдэрж байна.
Намайг өнөөдөр гадуур архичин гэж ярьдаг юм гэсээн, би анх Хип Хоп гэдэг зүйлд орохдоо архи уух дургүй, бусдыгаа дагаж уучихаад 00 ороод бөөлжөөд гаргадаг байсан, дараа нь үнэхээр зовлон үзээд ууж эхэлсээн. Уусаан. Үнээн. Тэр гялгар Гаванаг байхгүй болтол уусан. Гэхдээ хүн хүндээ хайртай байгаарай манайхаан, бүх зүйл учир жанцантай байдаг юм шүү. Зарим нэг нь юуун сүртэй юм иймхэн юмнаас болоод ууснаа зөвтгөлөө гэх байх, хүн хүний зовлон тэр хүндээ л зовлон байдаг шүү. За бас энэ нэг юм зүгээр байгаагүй болоол эхнэр нь явсан байх гэж бодож байгаа байх. Үнэнийг би мэднэ, бурхан мэднэ, тэгээд болоо.
Энд би ууснаа өмөөрөх гэж биш, архи гэдэг зүйлээс татгалзсанаар амьдрал ч бас яаж засарч болдогийг хэлэх гээд байгаа юм аа. Хар дарсан зүүд шиг амьдралаасаа салаад эргээд гэрэл гэгээг харж өөртөө итгэх шиг сайхан зүйл байдаггүй юм байна. Энийг уншиж байгаа хүмүүст сайн сайхан байдагт итгээрэй. Хайрт минь чамдаа баярлалаа энэ бүх зүйлд хамт байсанд, ээж аав минь ачийг нь хариулалгүй ийм удаан зовоосон хүүгээ өршөөгөөрэй, үлдсэн амьдралаа та хоёрыгоо жаргаана аа хүү нь, охин минь бодит явдал ийм байсанд итгээрэй, аав нь буцаад хүн шиг хүн болоод чам дээрээ очно оо, ард түмэн минь намайг дэмжээрэй, буцаж дуулах миний хувьд тийм амар байгаагүй юм шүү. Шинэ клипийг минь 2023/11/01-д хүлээн авна уу…
Хүндэтгэсэн,
Б.Нармандах"
Ийнхүү Гавана дахин урлагт ямар уран бүтээлээр орж ирэхийг харцгаая. Түүний өвөрмөц үглэлт, хэв маягийг дахин мэдрэх цаг ирлээ.
Scandal.mn
